Luke 4

Satan wo Jisas kamale toi

(Matyu 4.1-11 ne, Mak 1.12-13)

1God Murble Jisas boll puka to moika, une nu Jodan kapa kere er pi. God Murble Jisas dje i er dumo wapra yei al pi. 2Satan Jisas kamale to molo pika, ege 4-pela ten er wo pi. Jisas kwa mokna nano moika une koll toi. 3Koll toi moika Satan wo embe dji, ni God wariye kaima mon dal, ku kiwa djimbenka, er wo bret kul pundambe dji.

4Dji ba, Jisas embe dji, God kandjiye bolo wori paro ge embe djindo, nono mormon ge kwa eri no namopon we dji. 5Djika Satan Jisas ipo pla wori moika, Satan dumo kerman wopake yei mal porapora ombine dje awika, Jisas kune taimane kani. Pora djika 6Satan embe dji, dumo kerman porapora kanden ge yenekne kandjine kerman paro mal ne, yembene dongall paro mal ge, God i na awi pora dji. Na una auno panda ge auno. 7Ni kaken gopye boglo na kandjina amblo pla worin dal, wal porapora kanden ge ni imben we dji. 8Dji ba Jisas embe dji, God kandjiye bolo wori paro ge embe djindo, ye kakene gopye boglo, una kandjine amblo pla naworne. Iwa Kerman God taimane ge pille, kogoye yene we dji.

9Djika Satan Jisas dje ipo Jerusalem lotu numb kerman be pla kaima yei al wori moika, embe dji, ni God wariye kaima mon dal, plo dje er kal piye! dji. 10God kandjiye bolo wori paro ge embe djindo, une tau agelo dje wordaka wo ni amblo ineke 11ni kaken al ku ta nabopen we dji.

12Satan kandja embe dji ba Jisas embe dji, God kandjiye bolo wori paro ge embe djindo, God Iwa Kerman ge yembe paro mo naparo ne dje su nayeme! dji.

13Djika Satan Jisas kamale merke toi mal ge kere, er po molo alla yem wo yeno dje pille moi.

Jisas distrik Galili molo kogo kindja yeno dje yei

(Matyu 4.12-17 ne, Mak 1.14-15)

14God Murble wo Jisas boll moika, une er distrik Galili po moi. Una Jisas woi moro we djimaka dumo yemyem pa wani una porapora pi. 15Dumo porapora wani al Jisas lotu numb numog po God kandjiye dje awika, una porapora pille Jisas kandjiye amblo pla wori.

Jisas kandja dji ge dumo Nasartet una napille mop awi

(Matyu 13.53-58 ne, Mak 6.1-6)

16Dumo Nasaret Jisas asa po molo yaki al une po moi. Une singare ye ye yei mal pille Sabat ege yeika, une er lotu numb pi. Une numog po aglo molo, God kandjiye pepa al pai ge une kere auno dje yei, 17propet Aisaia pepa bolo pagi ge iwa ta iwo Jisas awika, une pelo kani kandja tuge ta bolo wori pai ge embe dji,

18God Murble ge na boll moraka, God na ngambalna al kopong ye woro, une na dje worika, una wal kane nanonj una mor al, na po kandja wopake dje auno we dji. Une na dje worika wo una kaye pa mor una dje i orko woro awo, una nalene emill yei una, na po amblo poi dje awo, una ye ke ye awinjka una imb kake mor al, na po amblo pille dje auno we dji. 19Asa God embe dji, na una ye wopake ye auno we dji mal ge une ipon yeno dje pille dji we dji.

20Jisas kandja dje pora dje kere, une buk amblo pakna woro, alla awo yem woro ami dje moi. Una porapora lotu numb numog moi ge Jisas taimane kanmolmaka, 21une embe dji, kandja buk al pai ye pi mal ge, ipon megye tondo we dji.

22Jisas kandja embe djika, una pille aya dji, Jisas una wopake moro dje pille embe dji, ge Josep wariye moro ba, une kandja wopake dje nono aundo we dji.

23Embe djimaka Jisas embe dji, ye kandja embe djinj ba, are ye na moro al kandja buko ta dje awo embe djine, dokta nenem gaklen amblo wopake ye aumben we djine. Ni dumo Kaperneam po kogo dongall yen we dji ge, ni nenem dumen al molo wal ta yembenka kanbon we djine. 24Na kandja kaima dje ye aundo, propet ta molo yene unakye mor al po, God kandjiye djinda, una napiye. 25Na kandja kaima dje ye aundo, kamasa iwa Elaija moi kune, kupill amblo pel yeika kam natoi. Koll kerman ke kaima ye pa pika, kognumb sokara yeika, takene 6-pela er wo pi, pora dji. Yei kune ge Israel ana kangill kambono merke moi ba, God Elaija dje nawori. Ana kangill taimane ta kona dumo Saidon paknato Sarepat moi al dje wori. 27Propet Elisa moi kune ge, Israel una ke kenj merke toi moi ba, Elisa Israel una taimane ta moi ge une po ye wopake ye nawi, man. Une dumo Siria una Naman ge ke kenj toika moi iwa ge, Elisa po ye wopake ye awi we dji.

28Jisas kandja embe djika una porapora lotu numb yei al pille ellne kumbso awi. 29Kambono numb gull take moi al sekerbye ta manda djeke kaima yeika, kambono Jisas i bekle po sekerbye yei al amblo pup to kal worbon dje yei. 30Ba une kambono moi al pakna kere er pi.

Iwa ta kum tukiye al moi ge Jisas wo i wori

(Mak 1.21-28)

31Jisas distrik Galili paknato molo er dumo Kaperneam po moi. Po molo ege Sabat ye ye yei kune ge une God kandjiye dje una awo moi. 32Jisas kandja dje awi ge una pille aya dji. Una namba paraka kandja djinj mal une kandja embe djindo we dji. 33Kune ge iwa ta lotu numb numog moika, kum ke tukye al moika une yau kerman to embe dji, 34A! Jisas ni dumo Nasaret una wonden. Ni wo no namba ye auno dje pille wonden? Ni wo no tano dje pille wonden mo? Na ni kando. God dje wori iwa wopake moro we dji ge ni wonden we dji.

35Kum ke tukye al moi ge Jisas kandja awo embe dji, ni kandja kere! Una ge kere er wo orko piye! dji. Djika una porapora kanmolmaka, kum ge ye molo una ge amblo pup to kal wori ba, ye ke ye nawo er orko pi.

36Una porapora moi ge aya dje, yenekne kandja dje pille embe dji, Jisas ge namba paro, yembe dongall paro, une kandja namba mal dji, kum ke iwa tukye al moi ge kere er wo orko pundo ne? dji. 37Jisas embe yei mal ge una kandja dje wai djimaka, una dumo pakna moi ge kandja pille pora dji.

Saimon kope gama ke to pai ge Jisas wo i gun woro awi.

(Matyu 8.14 ne, Mak 1.29-31)

38Jisas aglo lotu numb ge kere er Saimon numbiye al po moi. Saimon game gama ge megama ke to pai. Gakle ninga kerman dje paika, anagama ge ke embe tondo we dje Jisas dje awi. 39Jisas po anagama pai al magi dje, gakle ninga dji al une kane man dji. Djika, gakle kiwa yeika, anagama ola dje aglo po kwa mokna iwo una moi ge awi.

Una merke ke to moi ge Jisas i gun woro awi

(Matyu 8.16-17 ne, Mak 1.32-34)

40Olpa er kal puno dje yeika, una ke kayekaye toi moi i Jisas moi al iumaka, una taimane taiman dje moi ge, Jisas gaklene abika ke toi moi ge pora dji. 41Una merke kum ke tukne al moi ge Jisas i wori. Kum ke moi ge er orko bon dje ye yau to embe dji, ni God wariye wonden we dji, God Krais dje worno wo nanam unakna i yem worda we dji mal Jisas wale wondo dje kambono embe kani pille, Jisas kandja awo embe dji, ye kandja ge nadjime! dji.

Lotu numb merke yei al Jisas po wani

(Mak 1:35-39)

42Kam kindja tagika Jisas dumo moi al ge kere, er dumo una namoi al pi. Una merke dulo po, Jisas er tambye ta napunda, no boll moya dje pille embe yei. 43Kambono embe yemaka Jisas embe dji, nono mopon ba, God na dje wori woll ge, na dumo porapora po, yene dumoye kantau yendo mal ge, na dje una auno dje wori woll we dji. 44Jisas distrik Judia molo, lotu numb merke yei al po kandja dje una awo embe yei.